गूढ रहस्यांवर प्रकाश - विज्ञानाला न उलगडलेली रहस्यंचे लोकप्रभातील परिक्षण

                   

                   गूढ रहस्यांवर प्रकाश

आज विज्ञानाने जगातील यच्चयावत घटनांचा अर्थ लावला आहे. किंबहुना आपल्या आजूबाजूला असणाऱ्या सर्वच गोष्टींमागचं रहस्य उलगडून दाखविण्याचा प्रयत्न आजदेखील सुरूच असतो. इतकेच नाही तर अनेक रहस्यांच्या उलगडण्यातून विज्ञानाची प्रगतीच झाली आहे. 
तरीदेखील आजही अशा काही घटना आहेत, की ज्यांचा पूर्णपणे वैज्ञानिक वेध घेऊन त्यामागचं रहस्य उलगडता आलेलं नाही. अर्थात त्यासाठी वैज्ञानिक भरपूर प्रयत्न जरूर केले आहेत. पण ते ठोस निष्कर्षांपर्यंत पोहोचलेले नाहीत. अशाच काही न उलगडलेल्या रहस्यांचा वेध या पुस्तकात घेण्यात आला आहे. आसामातल्या जातिंगा येथील पक्ष्यांची सामूहिक आत्महत्या, हिमालयातील यतीचे गूढ, पक्ष्यांना लागणारी भूकंपाची चाहूल, किर्लिआन फोटोग्राफी, क्रॉप सर्कलल्स, वॉटर डाऊझिंग, हिमयुगाचे रहस्य, स्वयंभू आत्मदहन, प्रतिपदार्थाचे ब्रह्मांड अशा घटनांवर या पुस्तकातून प्रकाश टाकण्यात आला आहे. 
महत्त्वाचं म्हणजे हे पुस्तक काही केवळ रंजनात्मक पद्धतीने चमत्कृती मांडणार नाही. प्रत्येक घटनेच्या मागंच विज्ञान उलगडण्यासाठी नेमके काय प्रयत्न करण्यात आले आहेत त्याची सविस्तर माहिती हे या पुस्तकाचं विशेष म्हणावं लागेल. त्यामुळे हे पुस्तक चमत्काराचं पुस्तक न राहता त्याला रहस्य उलगडण्याचे विज्ञानाचे प्रयत्न मांडणारं ठरतं आणि विचार करावयास प्रवृत्त करतं.
/ विज्ञानाला न उलगडलेली रहस्यं
लेखक : पंकज कालुवाला

प्रकाशक : परम मित्र पब्लिकेशन्स

मूल्य : रु. १५०/-; पृष्ठसंख्या : १००

http://www.loksatta.com/lokprabha/book-review-of-dog-boy-1107541/